Amezketako plaza jendez lepo egonda, eta oso giro polita nagusitu da bertan. Asko gerturatu dira mendizaleak animatzera, eta beste askok euren lagun edo senitartekoari mokadutxoa edota zapatilak emateko zain egon dira. Gurutze Gorrikoek gune honetan azaldu dutenez, ez dute aparteko lanik egin, soilik artatze txikiren bat.
Bada, Amezketako gunean atseden pixka bat hartu, edatekoa nahiz jatekoa lasai hartu, eta Alegiarako bidean animoak emateko jende ugari izan dute parte hartzaileek. Alegiara sartzean, berriz, askok zuten buruan bertan zain zuten garagardoa. Intxurrekoek urteak daramatzate postutxoa jarri, eta bertatik igarotzen direnei garagardo frexkoa eskaintzen, eta gaurkoan ere ez dute hutsik egin.
Altzoko bide berritik joatera, bestalde, ez da jende gehiegi animatu, eta eguraldi kaxkarraren ondorioz, gainera, antolakuntzakoek ohiko bidetik joateko gomendioa egin dute. Hori bai, bertatik igarotzeko hautua egin dutenek bide polita dela nabarmendu dute.
