Herri Txikietako Areto Futbol Elkartea da GAEL, eta elkarteak antolatutako liga horretan parte hartzen dute eskualdeko herri txiki askotako taldeak. Apirilarekin batera amaitu zuten urrian hasi zuten denboraldia, liga eta kopari amaiera emanez. Hogeita bost taldek parte hartu dute maila ezberdinetan; tartean eskualdeko herri ezberdinak: Abaltzisketa, Ikaztegieta, Lizartza-Orexa, Bidania-Goiatz, Leaburu...
Denboraldiaren balorazio «ona» egiten du Jon Leundak, GAELeko koordinatzaileak: «Maila ona egon da, jendeak ondo erantzun du eta gustura gaude». Hutsuneak ere sumatzen dituzte. Batetik, «herri berrietan sartzea» kostatzen ari zaie, «lan asko» suposatzen duelako talde bat aurrera eramateak. Bestetik, «jende askok oraindik ez du sinisten historia honetan», «herri handietara» eta «hamaikako futbolera» begira baitaude Leundaren ustez. Aurrera begirako erronkak dira biak, hortaz.
Helburua «txikitatik hasi eta helduen maila arte» herri txikietan futbolean aritzeko aukera ematea da, eta aurrera begira taldeak mantentzen jarraitzea, eta herri berriren bat «erakartzea» da asmoa. Ametsa liga «Gipuzkoa osora» zabaltzea litzateke.
Denboraldi honetan ere Areto Futboleko eta Mikrofutsaleko Munduko Txapelketan parte hartu dute emaitza onekin, eta ordutik ate asko zabaldu zaizkie, «maila badagoelako». Horren erakusle, maiatzaren 21ean Logroñon izango direla txapelketa bat jokatzen. Bestalde, irailean Kataluniako Federazioak antolatutako Selekzioen Torneora joango dira GAELeko hiru talde, Euskal Herriaren izenean, Katalunia eta Frantziaren aurka jokatzeko.
LIGAKO ETA KOPAKO TXAPELDUNAK
Ligako irabazleak
Benjaminak. Txapelduna: Leaburu. Lehen talde mistoa: Leaburu.
Alebinak. Txapelduna: Txalburuk. Lehen talde mistoa: Bidania-Goiatz.
Infantilak. Txapelduna: GAEL.
Kadeteak. Txapelduna: Txalburuk. Lehen talde mistoa: Lizartza-Orexa.
Kopako irabazleak
Benjaminak. B Kopa. Txapelduna: Altzo. Lehen talde mistoa: Igeldo. A Kopa. Txapelduna: Bidania-Goiatz. Lehen talde mistoa: Bidania-Goiatz.
Alebinak. B Kopa. Txapelduna: Ikaztegieta. Lehen talde mistoa: Igeldo. A Kopa. Txapelduna: Baliarrain. Lehen talde mistoa: Bidania-Goiatz.
Infantilak. Txapelduna: GAEL.
Kadeteak. Txapelduna: Txalburuk. Lehen talde mistoa: Lizartza-Orexa.
Mikrofutsala. Txapeldunak. Mutilak: Txalburuk. Neskak: Bidania-Goiatz.
