Osotasunean euskaraz bizitzeko, gure hizkuntza eremu guztietara zabaldu behar dela uste dute Aduna, Alegia, Altzo, Amezketa, Baliarrain, Berastegi, Gaztelu, Ikaztegieta, Irura, Leaburu-Txarama, Lizartza, Orendain, Orexa eta Tolosako udalek. Udalerri horietako herritarrak euskarari dagokionean eredu direla eta horregatik administrazioarekin euskaraz aritzeko eskubidea eta beharra dutela uste dute. Aurten ere, errenta aitorpena euskaraz eginez, administrazioaren euskalduntzean eragiteko aukera izango dutela adierazi diete herritarrei Uemako kide diren eskualdeko 15 udalerriek.
MODU GUZTIETARA, EUSKARAZ
Errenta aitorpena modu askotan egin daiteke. Herritar askok autolikidazio proposamena jasoko dute egunotan. Proposamena onartzerakoan, euskaraz egin nahi dela esan eta aurrerantzean Ogasunarekiko harremanak euskaraz izateko aukera dago. Berdina egin daiteke, aitorpena era mekanizatuan egin nahi izanez gero. Aurrez aurreko harremanak, nahiz telefono edo internet bidezkoa euskaraz izan daitezke, horrela eskatuz gero.
Hain zuzen, aitorpena internet bidez eginez gero, errenta programaren bertsioa euskaraz jaitsi daiteke eta hobetsitako hizkuntza bezala euskara aukeratu.