Duela zazpi urte hasi ziren haurrentzako ekimen hau antolatzen, eta horretan dihardu Begoña Balerdik: "Gorren topaketa asko egiten dira urtean zehar, baina askotan helduak eta haurrak nahastuz. Pentsatu genuen txikiekin aparteko zerbait egin behar zela, galduta sentitu ez zitezen". Harrez geroztik, urtero txikientzako topaketa bat egiten dute Tolosan, Santa Lutzia auzoan duten egoitzan.
Arans-Gi Elkarteko gainerako bi gorren eskolekin, Donostiakoarekin eta Bergarakoarekin batera, antolatzen dute egun hau, elkarlanean. Gai bat aukeratu, eta horren bueltan eraikina atondu eta jokoak prestatzen dituzte. Aurten ordenagailua izan da aukeratutako gaia.
Elkar ezagutzea helburu
Topaketa honen helburu nagusia txikiek elkar ezagutzea da, "ikus dezaten ez daudela bakarrik, badaudela beraiek bezalako haur gehiago". Izan ere, urtean zehar haur batzuk isolatuta daude, beren ikastetxeetan ez dutelako beste pertsona gorrik. Tolosaldean, adibidez, badira hainbat adibide: Anoetan, Ibarran eta Tolosan, esaterako, haur bana dago. Horrela elkartzen direnean "asko gozatzen" dutela dio Balerdik.
Bergaran ere antzeko kasua dute. Mercedes Iñarra da bertako eskolaren arduradunetako bat, eta horrelako topaketek "haurren gor nortasuna sendotzen hastea" ahalbidetzen dute: "Oso gustura etortzen dira, eta haur gor gehiago ezagutzen dituzte".
Donostiako kasua bestelakoa da, izan ere, Amara Berri ikastetxean 17 ikasle gor dituzte, eta euren hartean talde dinamika lantzen dute. "Harremana dute euren artean, baina hala ere horrelako topaketak egitea ona da beraientzat. Txikitatik elkar ezagutzen hasten dira eta kontaktua mantentzen dute", dio Laura Karrera, Donostiako arduradunak.