Euskal gizarteak berezkoak dituen mendizaletasunak eta kultura zaletasunak bat egiten dute proiektu honetan. DSS2016EUren baitan kokatzen da eta Gipuzkoako Foru Aldundiak eta Club Vasco de Camping elkarteak sustatu dute.
Bidea egiteko antolatuko diren irteeretan, aldi berean, naturaz eta kulturaz gozatu ahal izango dute ibiltariek, bidean jarduerak antolatuko baitira; Martxoa eta urria bitartean, igandero eramango dute mendizaleek DSS2016EUren lekukoa Euskal Herri guztian zehar, ia 600 kilometrotan zehar.
2016 bidea proiektuaren ondare gisa, Gipuzkoako Foru Aldundiarekin elkarlanean, GR Sarea sortuko da, Gipuzkoako 7 GR nagusiak lotuko dituena. Euskal Herrian dauden Natur Gune Babestu guztietan etenik egin gabe oinez egiteko aukera emango du sareak, ireki diren bide berriei esker. Bizimodu osasuntsua eta ingurunearekiko errespetua sustatuko ditu egitasmo berriak.
Martxoaren 27an abiatuko da ekimena eta urria bitartean iraungo du. Proiektuaren inguruko informazio guztia bildu dute 2016 bidea web gunean.