Tolosaldeko bertsozaleek bikain erantzun dute beste urte batez Tolosaldeko ATARIAK egindako gonbiteari eta sei bertsolariren doinu, errima eta bertsoz lagunduta arratsalde bikaina pasatzeko aukera izan dute. Lepo bete da Leidor eta publikoaren berotasun horrek lagundu du bertsolariekiko komunikazioa osatzen.
Beti bezala, Amaia Agirre billabonatarra aritu da saioa aurkezten eta bertsolariei lana ematen eta kantuan sei bertsolari: Andoni Egaña, Maialen Lujanbio, Unai Iturriaga, Aitor Mendiluze, Beñat Gaztelumendi eta Unai Mendizabal Mendi. Aurtengoa zazpigarren aldiz antolatu da bertso jaialdia Leidorren. Hasierako urteetan eskualdeko euskarazko irratiak, Txolarre-k, hartu zuen antolakuntza bere gain eta behin Tolosaldeko ATARIA osatuta, komunikazio taldea da saioa aurrera eramateaz arduratzen dena.
Umorea ez da falta izan gaurko saioan, eta gai jartzaile bereziak ere izan dira. Beñat Gaztelumendiri, Gipuzkoako Bertsolari Txapelketako Txapeldunari, finalean txapela jantzi zion Iñaxi Etxabek jarri dio gaia banakakoan, bideo baten bitartez. Eta eskualdeko Harituz Bertsozale taldeko kideak ere izan dira gaur taula gainean bertso gaiak jartzen.
Gogoratu, bihar, igandea, bertso saioa osorik entzuteko aukera izango dela Ataria irratian; 107.6an edo 105ean Aiztondon.