Goizean goizetik esnatu dituzte gabon kantek bazterrak Tolosaldean. Adin guztietako jendea atera da eskean. Gehienek instrumentua izan dituzte lagun erritmoari jarraitzeko. Kax kax kax, milaka ate joko dira egun osoan zehar. Kantuaren ostean, ordaina jasotzeko esperantzarekin doaz taldeak. Jan eta edariarekin hartuko dituzte hainbatek, gozo-gozo.
Olentzero goiztiarrik ere izan da, Asteasukoa kasu. Mari Domingi alboan zuela txikienen gutunak jasotzen aritu da gauean bakoitzari zein opari utzi jakin dezan. Iruran, Mari Domingik egin du lan hori. Alegia, Amasa-Villabona, Ikaztegieta, Abaltzisketa, Amezketa, Bidania-Goiatz, Berastegi, Berrobi edota Tolosan ere izan da girorik.