Proiektu izaera kendu eta errealitate izatera pasatu nahi dute, lan mundu euskalduna; bai, behintzat, Tolosaldean. Sindikatuak, lanbide heziketa institutuak, Tolosaldea Garatzen, Lehiberri, udaletako euskara zerbitzuak, ordezkari politikoak, euskalgintzako eragileak nahiz gizarte eragileak eskutik aritu dira, pauso hori emateko beharreko oihala ehuntzen, eta bihar izango da aurkezpena, 18:30ean, Lehiberrin.
Belaunaldi berriak euskaraz lan egiteko prestatu dira –edo horretan ari dira–, eta oinarri hori abiapuntu hartuta, euskaraz bizitzeko esparru bat gehiago astindu nahi dute: lan eta enpresa munduarena.
Dinamika berri horren nondik norakoak ezagutzeko deia egin diete interesa dutenei, hain zuzen abiapuntu eta helburuen nondik norakoak hizpide izango baitituzte, ekitaldi hasieran. Ondoren, Tolosaldea, hizkuntza eta lan mundua bideoa proiektatuko dute.
Kike Amonarrizek, berriz, euskararen inguruko datuak plazaratuko ditu, lehenengo, ondoren horien inguruko hausnarketa saio txiki bat egiteko.
Saioaren zati teorikoena amaitutakoan, euskaraz bizi diren enpresen adibideak ezagutzeko aukera ere izango da, eta horretarako bertaratuko dira, Lehiberriko auditoriora, Fagorreko Leire Okaranza eta Oreka ITko Iraitz Perez de Goldarazena.
Jarraian, Joseba Barandiaran ekonomialaria elkarrizketatuko dute, enpresa mundua eta euskara uztartuz.
Azkenik, lan eta enpresa mundura aldaketa eraman nahi duen egitasmoaren aurkezpena biribiltzeko, dinamikaren beraren egitura deskribatuko dute, lan egiteko moldeak aurkeztuz. Batetik, Tolosaldeko lan mundua euskalduntzeko mahai bat sortzea da helburua eta, bestetik, berriz, euskaraz lan egiteko hautua egin duten edo egingo duten enpresen sarea osatzea.
Horrela, beraz, egitasmoa aurkeztu bitarte, guztia prestatzeko lanean aritu diren langile ordezkarien azken mezuaren ondoren, bertaratu guztiek mokadutxo batekin biribilduko dute, eskualdeko etorkizuna aldatzeko lehen pausoa izan daitekeena.