Le Mans Roller 2015 lasterketan eskualdeko patinatzaile ugari egon dira aurten. Ekainaren 27an eta 28an izan zen proba, eta bere berezitasuna, 24 orduko lasterketa bat izatean datza; autoen lasterketa ospetsua bezala.
Maila desberdinetan parte hartu daiteke 24 orduko lasterketan: banaka; binaka; 4-6naka; hamarnaka eta hamabinaka. Irristakakoek lauko talde bat osatu zuten alde batetik, eta bestetik, hamarreko bi taldetan hainbat lasterkari jarri zituzten. Azken horiek, beteranoen mailako lasterketan txapeldun eta txapeldunorde gelditu ziren. Maila horretan gainera errekorra jarri zuten; 24 ordutan 807 kilometro eginaz, hau da, zirkuituari 193 itzuli eman zizkioten.
Igor Aranburu ibartarra podiumean egon zen patinatzaileetako bat da. Esperientzia izugarria izan dela dio Aranburuk, eta euren proba irabaztea espero ez zuten zerbait izan dela aipatu du. Maila guztiak kontuan hartuta, bosgarren eta seigarren postuetan geratu ziren Irristakakoak zeuden bi taldeak.
Alain Irazu tolosarra beste taldean aritu zen, 4-6ko mailan. Le Mans-eko lasterketan irteten zen lehen aldia zen, eta euren helburua beste bat izan zela dio Irazu: «Gu proba eta giroa ezagutzera joan ginen. Amaieran 81 itzuli egin genituen, baina hori ez zen guretzat garrantzitsuena. Esperientzia, errepikatzeko modukoa izan da; ezagutzekoa».
