Eskuzkoak jokatzeko, Benjaminak Alkizara bilduko dira gaur arratsaldean; alebin mailakoek, gaur baita ere, Ikaztegietan dute hitzordua; infantilak, berriz, Amezketan ariko dira bihar arratsaldean. Paleta finalerdi guztiak larunbat arratsaldean jokatuko dira Tolosako Beotibarren. Sinistu merezi duela pilotari txiki hauen gogo eta trebezia ezagutzea.
Larunbat arratsaldeko partidak bukatzen direnean jakingo dugu nortzuk jokatuko dituzten finalak, uzatailaren 4ko eguartean, Tolosako Beotibarren. Hirurehun eta hogei pilotari, 45 neska eta 275 mutil, aritu dira orain arteko faseetan. Bada zerbait. Antolaketan bide lagun ditugu eskualdeko Pilota Elkarteak (Atzapar, Aurrera-Saiatz, Behar Zana, Intxurre, Sendi-Ekintza, Tolosa K.E, Txulobi, Zazpi-Iturri, Ziotza) eta Albiztur, Alkiza, Altzo, Berastegi, Ikaztegieta eta Lizartzako Pilota Eskolak. Gogotik eskertu nahi dugu beren laguntza, bestela ezinezkoa zatekeelako hau aurrera ateratzea. Esan behar dugu ere, Tolosaldeko Atariakook gustura gaudela elkarlanerako bilgune hau sortzeko aukera izan dugulako. Egin ditugu laprast txiki batzuk, ari denari gertatzen zaizkien horietakoak, baina horiek alde batera, guztia primeran doala iruditzen zaigu. Ondo doana hobeto bukatzea da orain egin beharrekoa, eta horretan jarriko ditugu gure ahalegin guztiak, uztailaren 4a, finalen eguna, daukagu jomugan.