Tolosaldeko Ataria barrutik ezagutzea izan zen atzoko irteeraren helburua. Hau da, ikasgelan praktikan eramandakoa mundu errealean horrela ote den baieztatzeko unea iritsi zitzaien atzokoan Anoetako ikastolako ikasleei.
Honela, Tolosaldeko Ataria-k 15 bisitari berezi izan zituen atzokoan; Anoetako ikastolako DBH 1. eta 2. mailako ikasleak. Ikastolan bertan irratigintza lantzen dutela probesturik, ataria irratia bertatik bertara ezagutu nahi izan zuten. Urko Kolomo irakaslearen gidaritzapean, lehenik eta behin bulegoan izan ziren eta bertako jarduna ezagutu ondoren saio praktikoa egin zuten irrati estudioan.
Kazetari onen paperean sarturik galderak ondo prestaturik bertaratu ziren anoetarrak. Baita hainbat estuasunean kazetariak jarri ere: «Lana bukatzen bazaizue, pentsatu duzue zer egingo duzuen?» edo «Betidanik kazetariak izan nahi izan duzue?». Azken galdera hau haiei bueltatu ordea, inork ez zuen oraingoz kazetaria izateko intentziorik; «futbolaria» bezalako erantzunak ohikoagoak izan ziren.
Hala ere, irrati estudiora sartu eta argi erakutsi zuten irratigintzan trebatu direla ikasturtean zehar. Gazte gara gazte irratsaioaren sei saio egin dituzte eta baita megafoniatik ikastolan bota ere, gaur emitituko dute ikasturteko azkena.
Tolosaldeko Ataria-ra eginiko bisitaldia ez da bakarra izan. EITBn ere izan dira eta Aitor Elduaien kirol kazetariaren bisitaldia ere izan dute ikastolan bertan.
Bisitaldi hauek kazetari sena piztuko ote dieten gerora ikusi behar.