Hauteskundeak 2015. Kanpaina

PSE-EEk bosgarren edukiontziaren alde egin du

Tolosaldeko Ataria 2015ko mai. 20a, 18:51
Tolosako Jose Ignacio Asensio (erdian), Irurako Miguel Angel Manjon (ezkerretik lehena) eta Ibarrako Felix Asensio (bigarrena).

PSE-EEko Tolosako Jose Ignacio Asensio, Irurako Miguel Angel Manjon eta Ibarrako Felix Asensio alkategaiak hiru herrietako bizilagunekin biltzen aritu dira gaur. Batez ere, bi kezka jaso dituztela esan dute: hondakinak biltzeko atez ateko sistema eta langabezia.

Tolosako alkategaiak esan du Ibarran, Iruran edo Tolosan alkatetzara iristen badira hondakinak biltzeko atez ateko sistema kenduko dutela eta bosgarren edukiontziaren alde egingo dutela.

Era berean, herritarrak langabeziarekin kezkatuta daudela esan du Asensiok, eta hori dela eta enplegua sustatzeko egingo dutela lan. Izan ere, Tolosaldean %15 eta 16 arteko langabezia tasa dago. Zentzu horretan, langabeziaren ondorioak bereziki pairatzen dituzten bi talde aipatu ditu: gazteak eta 45 urtetik gorakoak. PSE-EEk bi talde hauek babestuko dituela esan du. "Enpresak erakartzea da gure proposamena, eta horretarako Tolosaldea Garatzenekin eta Lehiberrirekin egin behar dugu lan, eta baita Gipuzkoako Foru Aldundiarekin, Eusko Jaurlaritzarekin eta Espainiako Gobernuarekin ere", esan du.

Horiek horrela, bi talde horien langabezia txikitzeko enplegu plan bereziak garatzea proposatzen du PSE-EEk. "Gazteek zailtasun handiak dituzte lehen lanpostua lortzeko eta esperientzia lortzeko, eta 45 urtetik gorakoak asko egoten dira langabezian, horregatik behar dute gure laguntza, politika aktiboak behar dituzte", esan du Asensiok. Gizarte zerbitzuen bermea lortzeko lan egingo dutela ere esan du, "hori izango da gure lehentasuna eta horretarako aurrekontuan aldaketak egin behar badira, egingo ditugu", gaineratu du.

Bukatzeko, EAJri leporatu dio Gipuzkoako Foru Aldundia Bilduren esku utzi izana. "Oso garrantzitsua da igandean botoa ematera joatea, eta PSE-EE bozkatzea Bilduren gobernuak ez egotea ahalbidetuko du", esan du.

 

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!