2013an, elkarrekin kantatuta, Plazatik Gaztetxera bertsolari gazteen txapelketako txapela jantzi zuten. Larunbatean, ordea, finalerako txartelaren bila arituko da nor bere aldetik. Oihana Iguaran eta Unai Mendizabalekin batera, Gema Urteaga, Jokin Bergara, Maialen Akizu eta Ortzi Murua arituko dira. 20:30etan hasiko da saioa.
Azken kanporaketa hilaren 28an jokatuko da Gabiriako Aztiri elkartean eta hemezortzi bertsolari gazteen artean sailkatzea lortu duten seiek kantatuko dute 44. Osinalde sariketaren finalean. Apirilaren 11n izango da.
Iazko irabazlea Aitor Irastorza zaldibiarra izan zen. Sariketa hau irabazi izan dute Jon Sarasuak, Xabier Euzkitzek, Maialen Lujanbiok, Igor Elortzak edota Aitor Sarriegik. Eskualdera ere etorri izan da Osinaldeko txapela: 1980an Millan Telleria albizturtarrak, 1995ean Bixente Gorostidi amezketarrak, 1997an Jexux Mari Irazu larrauldarrak eta 2010ean Mikel Artola alegiarrak jantzi dute.