Mendebaldeko Saharara laguntzeko abian da Elkartasun Bilketa eskualdeko hainbat herritan. Tolosaldea Sahararekin elkarteak bultzatzen du kanpaina hori eta errefuxiatu kanpamentuetara laguntza bidaltzea du helburu. Orokorrean hil honen bukaeran amaituko da epea bilketa egiteko. Elikagaiak, garbiketa produktuak eskola materiala eta botikak biltzen ari dira.
Bilketan parte hartzen duten bi herri dira Alegia eta Leaburu-Txarama. Alegian hilaren 23tik 27ra egingo da bilketa, San Juan ikastetxean eskola ordutegi barruan, eta udaletxeko Gizarte Zerbitzuetan, asteartetik ostiralera, 09:00etatik 13:30era. Bere aldetik, Leaburu-Txaraman hilaren 28a arte dago epea zabalik. Leaburun Ostatuan eta udaletxean, azken honetan bulego ordutegietan, eraman daitezke produktuak. Txaraman kultur eta osasun gunean, astearte goizetan dago horretarako aukera.