Zizurkil eta Villabonako udalek bi udalerriak lotzen dituen oinezkoen zubian beharrezkoak diren neurriak hartzeko elkarlanean ari direla esan dute. Izan ere, orain gutxi Zizurkilgo EAJko alkategaiak, Marian Lazkanok, Zizurkilgo Udalari bertako zorua konpontzeko neurriak hartzeko eskatu zion, hau labainkorra zelako. «Behin behineko konponbidea eman zaio zoru irristakorrari», esan dute. «Prentsara jo zuenerako eginda zegoen lana, baina bistan da ez dela zubitik aspaldi igaro. Nola ez da ohartu hainbeste kezkatzen duen zubi horren aldaketaz? Bertan bizi ez delako, agian?», gaineratu dute Zizurkil eta Villabonako udalek.
Hauteskundeak
Lazkanok zubiak akatsak dituela salatu zuen, eta horri ere erantzun nahi izan diote udalek: «Ikusgarria da bere legealdian hartutako erabakiak nola leporatzen dizkigun oraingo ordezkarioi. Garai ezberdinak dira, bai... eta eskerrak!».
Era berean, zubiaren zorua hauteskunde aurretik konpontzea borondate kontua dela zioen Lazkanok, eta udalek diote kontua borondatea zein den jakitea dela. «Irudia garbitzea edo zubi on bat uztea. Zizurkilgo eta Villabonako udalak zubi horri konponbidea jartzeko lanean ari dira eta momentuko irtenbideaz gain, zorua betiko egonkortuko lukeen ere aztertu dugu, aurrekontuak prestatuz. Uda garaian egin beharreko lanak dira, ordea, emaitza ona lortu nahi bada. Eta gure lehentasuna, batzuena ez bezala, ez da prentsan titular bat lortzea; aurrera begira herritarrei mesede egingo dien zorua lortzea baizik».
Villabona eta Zizurkilgo udalek behin behineko neurriak hartu dituzte
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!