Urteak dira, jada, Tolosako Laskorain ikastola eguberrietako elkartasun azoka antolatzen hasi zela. Eskualdeko herritarren babesaren isla, 19.300 euro eman dizkie, ikastolak, Ibarratik misio taldeari eta Tolosaldea Sahararekin elkarteari, Hondurasen (Teguzigalpa-Suyapa) eta Saharan (Midyik) dituzten egitasmoetara bideratzeko. Saldu gabe gelditu den guztia, berriz, Emaus Fundazioak jaso du.
19. Merkatu Txiki honetan, 130 dendari eta erakundek hartu dute parte, eta zabalik egon den egun guztietan, 200 guraso, ikasle, ikasle ohi eta gainerako herritarren laguntza izan du. Hori dela eta, Laskorain Ikastolak "esker ona" adierazi nahi izan die laguntzaile horiei, nahiz bertan salgai egon diren produktuak eskuzabaltasunez eman dituzten herritar eta dendari guztiei.
Partaidetzari dagokionez, "merkatu txikiak jasotzen duen erantzuna areagotzen" ari dela azpimarratu dute antolatzaileek.
Irudietan, Ibarratik Misio Taldeko eta Tolosaldea Sahararekin elkarteko kideak, Irene Larrazaren eskuetatik diru-laguntza jasoaz.
