Aiztondoko sei udaletako ordezkariek manifestazio isila deitu dute

Maier Ugartemendia 2014ko abe. 23a, 19:53

Manifestazioa abenduaren 31n izango da, 'Giza eskubideak, konponbidea, bakea' lelopean eta euskal presoek pairatzen dituzten "eskubide urraketak" salatzea du helburu

Gabon jaietan herritik urrun dauden  edo ondoan ez direnak gogoratzeko egunak izaten dira, eta eskualdean euren herrietatik urrun Espainiako eta Frantziako espetxeetan dauden euskal presoak gogoan izango dituzte datozen egunetan antolatu dituzten ekimen ezberdinetan.

Gaur Adunan bildu dira Amasa-Villabona, Zizurkil, Asteasu, Aduna, Larraul eta Alkizako udal ordezkariak, euskal presoek pairatzen dituzten «eskubide urraketak» gaitzesteko, eta espainiar eta frantziar estatuei  eskubide horiek bermatzeko «beharrezkoak diren neurriak» hartzeko exijitu zieten, eta egoera horren aurrean «erakunde publiko zein herritarrek asko egin dezakegula» uste dutenez, herritarrak mobilizatzea «beharrezkoa» dela adierazi zuten.

Horregatik guztiagatik, Aiztondo bailarako udal ordezkariek, abenduaren 31n, 19:00etan, Villabonako Errebote plazatik irten eta Zizurkilgo Joxe Arregi plazan amaituko den manifestazio isilean parte hartzeko deialdia egin dute.

Manifestazio horretan espainiar eta frantziar estatuei eskaera hauek helarazi nahi dizkiete: "Dispertsioa amaitzea eta euskal presoak euskal herriratzea, gaixotasun larriak dituzten presoen berehalako kaleratzea, 70 urtetik gora dituzten presoak kaleratzea, zigorraren hiru laurdenak bete dituzten presoen kaleratzea".

Era berean, urtarrilaren 10ean Sarek Bilbon burutuko duen manifestazioarekin ere «bat egin» zuten.

 

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!