Ostiralean Leaburu-Txarama eta Ibarraren arteko mugarriak jarri zituzten. Bi herrietan osatutako komisioetako kideak eta lurjabeak ere bertan izan ziren.
Ibarrako Udalaren ekimena izan zen mugarri hauek berrezartzearena. Leaburu-Txaramako Udalari proposamena egin ostean, bi herrietan komisioak osatzea erabaki zuten. Komisio hori pertsona hauez osatu behar zituzten bi herrietan: alkatea, bi zinegotzi, idazkaria, arkitektoa eta bi testigu. Behin komisioak osatuta, mugak adostu zituzten bi herrien artean, eta Apatta industrigunean erdituta geratzen ziren zenbait enpresa banatu zituzten.
Horiek izan dira egin diren aldaketa bakarrak, gainerako mugarriak ez dira aldatu, bere horretan jarraitu baitute. Ondoren, prozesuaren hurrengo pausua komisioen eta mugakideen artean bilera bat egitea izan zen, eta ondoren, mugak non eta nola jarri erabaki zuten.
Adostasuna lortuta, ostiralean komisioetako kideek beharrezko agiriak sinatu zituzten, eta mugarrietan barrena ibilbidea egin zuten. Lehen mugarrian Tolosako ordezkariak ere izan ziren, hiru herrien muga zehazten baitzen. Hortik aurrera, Ibarra eta Leaburu-Txaramakoek ekin zieten mugarri guztiak bisitatzeari eta beharrezko agiriak irakurtzeari.