Zortzigarrenez ospatu zituzten, pasa den larunbatean, Euskadiko VIII. Soinu Zahar txapelketa eta XXXIV. Aurresku txapelketa. Emakumezkoen sailean Ane Urruzola billabonatarra bikain aritu zen eta, egindako lanaren erakusgarri, bigarren postua eskuratu zuen Pasai Donibaneko kiroldegian.
Guztira, 13 neska aritu ziren Gipuzkoako dantzen pausoekin jolasean, eta Ormatxulo, Upelategi eta Kontrapasa dantzatu behar izan zituzten lehen fasean. Aurreko hiru dantzetako lehen zortzi sailkatuek, ondoren, Erribera soinu zaharra dantzatu zuten.
Aipatzekoa da, Ane Urruzolarekin batera Maddi Otegi billabonatarra ere sailkatu zela azken fasera, eta Mapi Egues eta Izaro Urrestarazu ibartarrak ere lehian aritu zirela.
Aurresku txapelketari dagokionez,ez zen eskualdeko ordezkaririk izan gizonezkoen sailean, eta Iker Larunbe atarrabiarrak bosgarrenez eskuratu zuen garaikurra; Soinu Zahar txapelketa, berriz, Izar Etxeberria oiartzuarrak eskuratu zuen, bigarrenez.