Asteazken arratsaldean agerraldia egin zuten eskualdeko hainbat eragilek Tolosaldeko AHT Gelditu! Elkarlanarekin batera. Bertan, azken asteetan Hernialdeko zuloa dela eta piztutako alarmaren aurrean beraien iritzia luzatu zuten.
Urte askotako «borrokan» egindako salaketak «errealitate bihurtu» direla esan zuten prentsaurrekoan. Anoetan lehortu diren bi errekak, Adunan nahiz Anoetan agortu diren iturriak, uda amaieran Alkiza errekan hilik agertu ziren amuarrainak... guzti hauek aipatu zituzten ordezkariek eta gertaera isolatuak ez direla azpimarratu zuten: «Egoerak bere horretan jarraituz gero, atzera bueltarik gabeko ondorioek jarraituko dute».
Proiektuaren gastu ekonomikoa «etengabe» goraka doala salatu zuten agerraldian. «2015eko aurrekontuan %68a gizartearen beharrizanetatik urrun dagoen proiektu honetarako izango da» baieztatu zuten eta diru publikoarekin «esku pribatuak aberasten» jarraitzen dutela ere gaineratu zuten « eskualde honetan osasungintza publiko baten aldeko apusturik egiten ez den bitartean».
Elkarretaratzea larunbatean
Aurreko arrazoi guzti hauen aurrean, Tolosaldeko AHT Gelditu! Elkarlanak eta atxikimendua emandako hainbat eragilek larunbat honetarako elkarretaratzera deitu dute. «Handinahi ekonomikoek lurraren jarraibidea oztopatu ez dezaten eta interes pribatuak publikoaren gainetik egon ez daitezen» hitzordua jarri zuten Tolosako Trianguloa plazan, 12:30ean.