Asteburuan Anoetan eta Ibarran festak ospatuko dira, eta Tolosaldeko Asanblada Antifaxistak «azken boladan» eskualdean «eraso matxista ugari» jasan direla eta «inork zentzuzko alternatibarik» proposatu ez duenez, proiektu bat jarri dute abian. Hain zuzen ere, gaur gaueko 00:00etatik hasita, orduro, egunsentirarte, topaketak egingo dituzte inor etxera bakarrik joan ez dadin. Ibarrako plazako zubi inguruan eta Anoetan trenbide gaineko herri sarrerako zubian elkartuko dira.
Hala ere, hau «momentuko erantzuna» dela eta arazoari aurre egiteko «nahikoa ez dela» diote; izan ere, «erasotzaileek sistema patriarkaletik jasotako balioak azaleratu besterik ez dituzte egiten» euren ustez. Momentuko erantzuna «beharrezkoa» dela uste dute, «erasotuek momentuan zein ondoren sufritzen baitute». Gauzak honela, «patriarkatua suntsitzea» eta «erasoei erantzutea beharrezkoa» dela uste dute. Eta hori «guztion ardura» da.
Beraz, herritar guztiei «brigadetan parte hartzeko gonbidapena» luzatu diete; prest daudenak herri horietako txosna zein gaztetxeetan telefono zenbaki bat izango dute horretarako.