Espainiako Gobernuak bi milioi euroko diru laguntza agindu zuen Lehiberri zentroa finantzatzeko baina lehendabiziko milioia besterik ez zuen eman. Ondorioz, Tolosaldea Garatzeneko administrazio kontseiluak Espainiako Gobernua salatu zuen epaitegietan, eta Auzitegi Nazionalak arrazoia eman dio Tolosaldeko garapen agentziari. Ondorioz, Espainiako Gobernuak falta den dirua eman beharko du.
Ibai Iriarte Tolosaldea Garatzeneko lehendakariak esan duenez, prozesua luzatu daiteke, hala ere, izan ere Espainiako Gobernuak 10 eguneko epea du sententzia honi helegitea aurkezteko, eta beraz auzia Auzitegi Gorenera eramateko. Honek asko luzatuko luke prozesua.
Aurrekariak
Espainiako Gobernuak 2010eko aurrekontuetan zehaztu zuen Lehiberri finantzatzeko partida bat, eta urte berean sinatu zuten hitzarmena Tolosako Udalak Espainiako Zientzia eta Berrikuntza Ministeriotik milioi bat euro jasotzeko. Baldintza, inbertsioa urte hartan bertan egitea zelarik.
2011ko aurrekontuetan ere beste milioi bat euro aurreikusi zituzten, diru hori Tolosaldea Garatzenek jaso behar zuelarik. Hitzarmena ere sinatu zuten orduan. Baina diru hori da hain justu, iritsi ez dena, eta ondorioz, beste bide batzuk jorratu behar izan zituzten.
Diru laguntza hori ez jasotzeak ekarri duena da azkenean eskualdeko udalek 810.542 euro jarri dituztela, horietatik 525.000 euro mailegu bitartez, hasieran 335.542 euro jarri behar zituztelarik. Gipuzkoako Foru Aldundiak ere 525.000 euro jarri behar izan ditu, diru laguntza jasoz gero itzuli egin behar den kopurua.
Aurrera begira
Eusko Jaurlaritzak hasieratik aitortu zuen Euskadiko Zientzia eta Teknologia Plangintzan marraztutako estrategiarekin bat datorrela Lehiberri, eta hori dela eta Tolosaldea Garatzenek ezinbestekotzat jotzen du proiektua babestea eta baliabide ekonomikoak bermatzea. Izan ere, Eusko Jaurlaritzak ez du diruz lagundu proiektua.