Eskola garraioko langileen greba mugagabeko bigarren eguna da gaurkoa. Atzo bertan zerbitzu hau ematen duten Eulen eta Clece enpresak bildu ziren Eusko Jaurlaritzarekin, baina ez ziren adostasun batetara iritsi, eta beraz, greba mugagabearekin jarraitzen dute. Tolosaldean Asteasu, Villabona, Alegia eta Amezketako eskoletako langileek egin dute bat deialdiarekin, eta ez Tolosako Samaniego ikastetxean, eta hori dela eta, elkarretaratzea egin dute eskolan.
ELA, LAB, CCOO eta UGT sindikatuetako ordezkariek eskatzen dutena da langileek ez pairatzea lan erreforma, eta beraz, beraien lan baldintzak blindatzea. Era berean, autobusetako eta jolastokietako langileek jantokietako langileen lan baldintzak eskatzen dituzte, horrek, besteren artean, orain jasotzen duten soldata %2,5ean igotzea suposatzen duelarik.