Azken txanpan sartua dago Bertsolari Txapelketa Nagusia. Bihar azken finalaurrekoa jokatuko da Maule-Lextarren eta saio horren ostean jakingo da zeintzuk izango diren abenduaren 15eko finalean kantatuko duten bertsolariak. Sei bertsolari ariko dira nor baino nor, eta horietatik bi eskualdekoak dira, Aitor Mendiluze irurarra eta Jexux Mari Irazu larrauldarra. Saioa 17:30ean hasiko da, Ororena ezker paretan.
Mendiluze eta Irazurekin batera, Agin Laburu, Jone Uria, Sustrai Colina eta Unai Agirre ariko dira bertsotan.
Azken finalaurrekoa izanik, Maule-Lextarreko saioa amaituta finalaurrekoetako puntuaziorik onenak dituzten zazpi bertsolariek abenduaren 15ean kantatuko dute, Maialen Lujanbiorekin batera, BEC-en. Puntuazioaren arabera, Elortzak, Arzallusek, Gaztelumendik eta Iturriagak finalean beharko lukete. Mendiluzek eta Colinak ere ia ziur dute bertarako txartela.
Biharko saiorako sarrerak www.bertsosarrerak.eu webgunean, Maule-Lextarren Xiberoko Botza irratiaren egoitzan eta Baionan Elkar megadendan daude salgai. Ateak 16:00etan zabalduko dituzte.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!