Beste eskualdeekin alderatuta exkaxa da Tolosaldean jasotzen dugun osasun zerbitzua TOPAren iritziz. Kexak ere geroz eta ugariagoak dira: mediku jeneralistak espezialisten lanak egiten ari direlako, kontsultaren zain bi ordu eta gehiago egon behar izan duelako jendeak edota oso erizain eta solairuetako zeladore gutxi daudelako. Itxaron zerrendak geroz eta luzeagoak dira gainera.
Borrokan segitzeko arrazoiak ugariak direla uste dute osasun publikoaren aldeko mugimendutik. Osoki hornitutako espezialitate anbulatorio bat eta eskualdeko ospitale publiko bat izan dezagun. Osasun zerbitzua pribatizatzeko saiakera honen aurka hainbat konpromiso hartu ditu TOPAk. Besteak beste, kexak aurkezten segiko dute eta osasun arloan lanean ari diren gainerako eragileekin elkarlana bultzatuko dute. Foru Aldundia eta Eusko Jaurlaritzarekin biltzeko asmoa ere badute eta indarrak batuz gero, eskualde mailako herri-kontsulta bat egiteko aukera aztertuko dute koordinakundetik.
TOPAko kide batekin hizketan aritu da Tolosaldeko Ataria.