Paueko Dei Auzitegiko Instrukzio Ganberak atzo aztertu zuen Jokin Aranalde iheslariaren kontrako euroagindu eskaera. Abokatuak defentsa prestatzeko denbora gehiago eskatu du baina epaileak uko egin dio eskaerari eta prozedurak aurrera jarraitu du. Hilaren 16an jakinaraziko dute erabakia. Bada, azken atxiloketak salatu eta euroaginduak bertan behera uztea exijitzeko, Bake Bideak manifestazioa antolatu du Baionan, uztailaren 20an.
Aranalde ekainaren 24an atxilotu zuen poliziak Heletan, Nafarroa Beherean. Gaztelun jaioa, urte luzez Ibarran bizi izan zen. 2002an joan zen Ipar Euskal Herrira bizitzera.