Usabal kiroldegiko igerilekura irakurzaletasuna eraman, eta jendearen aisialdia betetzeko helburuz, irailaren 7ra bitarte zabalik izango da udako liburutegia; astelehenetik larunbatera bitarte eskainiko dute zerbitzu hau, 15:00etatik 19:00ak arte.
Egunkariak, aldizkariak, komikiak, eleberri laburrak, turismoko gidaliburuak nahiz sukaldaritzari buruzko liburuak daude eskuragarri, eta bertan irakur daitezke. Hala nahi izanez gero, eta liburutegiko harpidedun izanez gero, berriz, maileguan ere hartu ahal izango dira liburuak. Gainera, aipatzekoa da harpidedun txartela egin nahi duenak igerilekuko liburutegian bertan eskuratu ahal izango duela, momentuan.
Honekin batera, wifi zerbitzua ere eskainiko diete Usabaleko erabiltzaileei, eskuko ordenagailuekin hara joan eta sarera konektatu nahi dutenentzat.