Aimar Agirresarobe tolosarra emaitza bikainak ari da lortzen triatloian, baina badira eskualdean maila bikaina erakusten ari diren kirolari gehiago. Aitor Regillagak (Mahala TTT), esaterako, Aragoiko Monegrosman distantzia luzeko triatloia irabazi du. 2011n ere irabazi zuen proba hori, eta aurten lehiakideen maila igo bada ere, bigarrena lortu du. Edu Gonzalez taldekideak ere parte hartu zuen proban. Bizikletan zulatua izan arren, aurrean amaitzea lortu zuen.
Bestalde, Lekeitioko nazioarteko sprint triatloian, Egoitz Zalakain (ASS) hirugarren sailkatu da, eta Maialen Muñoz (Mahala TTT) 23 urtez azpikoen podiumean izan da, hirugarren koskan, proba hamabigarren amaituta.
Azpimarratzekoa da, baita ere, Nizako (Frantzia) Iron Man proban Gorka Sarasola eta Ion Artutxa taldekide eta koadrilakideek (Peña Dupons) lan handia egin dutela. Elkarrekin helmugaratu dira 366 eta 367 postuetan sailkatuta (beren adin taldeetan 85 eta 86 postuetan), 10 ordu eta erdiko marka eginda.