Probako marka ezarri du amezketarrak, 74 kilometroko ibilbidea 11 ordu eta 21 minututan egin eta gero
Iker Karrera mendi lasterkari amezketarrak beste garaipen bat lortu du, Europako Mendien lasterketa irabaziz. Bertako marka hobetu du, gainera, 11 ordu eta 21 minututan lanak eginez.
Lasterketak 74 kilometroko ibilbidea du, maldan gora 6.550 metro, eta maldan behera 6.585 metro eginez. Karrera «oso pozik» azaldu da egindakoarekin: «Lasterketak oso teknikoa, gogorra eta zaila izatearen fama du, baina horrez gain, ederra dela ere beti esan izan da. Gaur [larunbata] hori guztia berretsi ahal izan dut». Probaren zati handi bat bakarrik egin zuen, eta elurretan gainera, zenbait zatitan; gogorra zegoenez, ordea, denbora ona egiteko balio izan zion.
Asteburuko proba gogorraren ondoren, atseden pixka bat hartuko du Iker Karrerak, datorren uztailaren 20ra bitarte. Izan ere, Suitzako Eiger Ultra Trail proban parte hartuko du amezketarrak, aurreikuspenen arabera; 101 kilometro burutu beharko dituzte norgehiagokan.