Ardi, behi eta behorren aitzakian, festa giroan ospatu dute Larraitzen, beste urte betez, Aralarko larre irekiera
Abereen aitzakian antolaturiko festa egunak, milaka bisitari bildu zituen Txindokiren magalean.
Aurtengo maiatzaren lehenak ere ez du hutsik egin, eta Larraitzen festa giroa nagusi izan zen atzo, Aralarko larre irekieraren harira.
Artisauen postuek nahiz jakirik gozoenek milaka bisitari erakarri zituzten Txindokiren magalera, eta goizean goizetik abereei eskainiriko hamaika ikuskizun izan ziren: zaldi domatzailea, mendiko behor eta zaldien Gipuzkoako lehiaketa nahiz aizkolarien erakustaldia.
Ardi, behi eta behorren aitzakian, bertsolariak ere aritu ziren, eta bazkari legea egin ondoren, oinak astintzeko aukera izan zuten bertaratuek, Triki Beltz taldearen erromeriako doinuez.
Era berean, Nafarroa eta Gipuzkoa lotzen dituen Ausa Gaztelu mendiaren eguna ere ospatu zuten Aritza kultur elkartekoek, eta festarekin bat egin zuten ibilaldiaren ondoren.
_______________________________________________________________________________________
Amasa-Villabona: ABEREEN GOIZA KOMIZARREN ERE
Maiatzaren 1a aprobetxatuz, Villabonako Udalak bigarrenez antolatu du, aurten, Komizarreko larre irekiera. Atzo goizeko eguzkiaren babesean, hainbat herritar igo ziren Komizarreko belazeetara, eta abereak larreetara igotzearen aitzakian, trikitia eta hamaiketakoa izan zituzten lagun.