Ibarrako Unai Otañok eta Zizurkilgo Joseba Otaegik Urrezko Aizkorako binakako txapelketan garaipen garrantzitsua izan dute asteburuan. Mugertza II.a eta Atutxa II.aren aurka aritu zen bikotea, eta bikote bakoitzak sei lan egin behar izan zituen. Mugertzak eta Atutxak lehen bi probak irabazi zituzten, hau da, lehenengo 45 ontzako enborra kolpe gutxiagotan moztu zuten lehenengo, eta gero, erlojuz kontra, bi 45 ontzako ebaki zituzten aizkolari bakoitzak. Hirugarrenetik garaile Hirugarren lanetik aurrera hasi ziren Tolosaldeko aizkolariak egoerari buelta ematen. Iraupen proban 20 segundoko aldea atera zieten bizkaitarrei, eta txanda librean, ere irabazi zuten, bi 45 ontzako, bi kana-erdiko eta bi 60 ontzakoak erdibitzen azkarrenak izanda. Lan guztiak bukatzeko 19 minutu eta 17 segundo behar izan zituzten Otañok eta Otaegik eta besteek, aldiz, 21 minutu eta 32 segundo.