Eskualdeko ikastetxeak kultur asteak ospatzen ari dira. Villabona eta Zizurkilgo Jesusen Bihotza ikastolan, atzo hasi ziren egitaraua dantzan jartzen. Gaur, hilaren 29an, sexu heziketaren inguruko lantegia egingo dute goizean, DBH 3koek, eta arratsaldean, ikasle guztiak Gurea aretoan elkartuko dira, emanaldia eskaintzeko.
Bihar, asteazkena, kirolak izango dira protagonista goizean, eta 17:30ean, Jokin Zabalak sukaldaritza ikastaroa zuzenduko du Zizurkilgo Urkamendi elkartean.
Ibarrako Uzturpe Ikastolan eta Tolosako Fleming-en ere kultur astean murgildurik daude. Bata zein bestean, egitasmoari amaiera ostegunean emango diote. Ikastetxe guztietako egitarauak www.tolosaldea.hitza.info helbidean daude.