«Presoei dagozkien oinarrizko giza eskubideak errespetatzea» eskatu dute testu bateratuan
Herrirak presoen giza eskubideen alde bihar Bilbon deituriko manifestazioarekin bat egin dute, LABek, EHNEk, Laskoraingo Ikasle Independentistek, Ikasle Abertzaleak, Bilgune Feministak eta Bilduk.
Besteak beste, «gatazka egoera atzean utzi eta denen artean bake egoera justu bat eraikitzeko aukera berriak» daudela azaldu dute testu bateratuan, eta «gatazkaren ondorio guztiek konponduak» izan behar dutela diote.
Honen harira, «gatazkaren ondorioz preso eta erbestean dauden herritarren egoerari arreta jartzea beharrezkoa» dela uste dute eragile hauek guztiek.
Horrela, «euskal presoak Euskal Herriratzea, gaixotasun larriak dituzten presoak libre uztea, espetxe zigorren luzatzeekin amaitu eta de facto bizi osorako espetxe zigorra dakarten neurrien indargabetzea, eta pertsona gisa dagozkien giza eskubide guztien errespetua» eskatu dituzte, sinaturiko testuan.
Honenbestez, «aldarrikapen hauei bultzada emateko», eta bide honetan, «frantziar nahiz espainiar gobernuei urratsak ematea eskatzeko», bihar Bilbon burutuko den manifestaziora joateko deia egin nahi izan diete herritarrei.