Tolosako Udalak Euskarazko Produktuen Katalogoa erabiltzera animatu ditu gurasoak. Inaki Irazabalbeitia zinegotziak azaldu duenez, «haurren giro euskalduna ziurtatzeko kontuan izan dezatela katalogoa», eta Gabonak laster iritsiko direla gogora ekarri du. «Gure gizartea euskaldundu nahi badugu eta etorkizuneko euskaldun osoak nahi baditugu eta gure ingurunea euskalduna izatea nahi badugu, euskarak alor guztietan egon behar du», nabarmendu du Irazabalbeitiak.
Tolosako ikastetxeetan 3.500 ale banatu dituzte, «gurasoek erreferentzia bat izan dezaten euskarazko produktuak erosteko unean». Egun hauetan etxean jasotzen den publikazio sortaren artean, Euskarazko Produktuen Katalogoari jaramon gehiago egiteko eskatu du Irazabalbeitiak. Katalogoan era guztietako produktuak daudela azaldu du: musika, filmak, informatika, aldizkariak, liburuak, jostailuak… Paperezko katalogoan ez daudela produktu guztiak zehaztu du eta eskaintza guztiaren berri izateko www.katalogoa.org webgunean daudela gaineratu dute. Hainbat erakundek bultzatzen dute katalogoa: foru aldundiek, Eusko Jaurlaritzak eta UEMAk.
Euskararen Eguna aurki izango dela eta, udalak antolatu duen hitzaldi baten berri ere eman dute agerraldian. Hilaren 29an, 19:30ean, Xabier Amurizak Zazpi ebidentzia birjaiotzarako hitzaldia emango du udaletxeko bilkura aretoan. «Hemendik aurrera euskara batuaren eboluzioa nola ikusten duen azalduko du», esan du Irazabalbeitiak. «Baditu ideia berriak, ideia bereziak, ausartak, eta ziur aski euskalgintzan aritzen direnentzako kitzikagarriak izango direnak, eta aldeko eta kontrako iritziak sortu ditzakeenak».
Bestalde, abenduaren 1ean Donostian egingo den manifestaziora joateko deialdia egin du. Euskararen Gizarte Erakundeen Kontseiluak antolatu du, Euskaraz bizi nahi dugu lelopean, eta Anoetatik 17:30ean aterako da.
Beste herrietan ere bai
Villabonako Udaletik azaldu dutenez, herrian ere ikasleen artean banatuko dute Euskarazko Produktuen Katalogoa. Leitzan eta Areson ere datozen egunetan banatzen hasiko dira.
Berriki Aztiker enpresak egindako azterlan baten ondoren, zenbait emaitza esanguratsu atera dituzte. Esaterako, katalogoa banatzen den herrietako gurasoen %41k ezagutzen du, eta ezagutzen dutenek oso ondo baloratzen dute: 7tik gorako puntuazioa ematen diote paperezkoari bezala interneteko edizioari ere. Bestalde, gurasoen ia hiru laurdenak (%72,1) adierazi du produktuak erosteko erabili duela; guraso elebidunen kasuan %86,1ak.