Udaberri dantza taldeak 55. urteurrena ospatzeko bertso afaria antolatu du larunbatean, Alaia Martin, Iker Zubeldia eta Amets Arzallus bertsolariekin. Gaur izango da txartelak erosteko azken eguna, Denak, Ikatza, Orbela eta Raku tabernetan, 20 euroren truke.
Bertso afariaren aurretik, ordea, Bordondantzaren inguruko DVDaren aurkezpena izango da udaletxeko pleno aretoan, 18:00etan. Egun dantzan eta taldean jardunean dabiltzan gazteek beste ikuspegi batetik erakutsi nahi izan dute bordondantzariaren prestakuntza eta ekainaren 24ko eguna bera.
Jai giroan murgiltzeko, triki-poteoa egingo dute 19:30ean, eta 21:00etan hasiko da afaria, Zerkausian
Iurren ere bertso doinuz
Iurre elkarteak ere, larunbatean egin du urteroko zita, bertsolariekin. Horrela beraz, 21:00etan hasiko da han ere afaria. Julio Soto, Jon Maia eta Andoni Egaña ariko dira kantuan, eta 25 euroren truke bertan afaltzeko aukera izango da. 680 27 35 83 telefonora deituta eskura daitezke afari txartelak.