Bigarren B mailan iaz izandako urte gogorrean jaitsiera postuetan amaitu eta gero, aurtengo denboraldian betiko Nazional B izandako Hirugarren maila berrian jokatuko du Laskorainek bere toki naturalera behin itzulita, larunbatean jokatuko duen partidarekin. Azken bi urteetan egindako Javiren lan bikainari, joan den denboraldian ordezkari lanetan izandako Aitor Garcia entrenatzaile berriak emango dio jarraipena, erronka polita izango du aurretik kalitatez beteriko argazkia baitu bere eskuetan.
Loitzun eta Xabi Diezen bajak gertatu dira udan eta lehen taldera zuzenean etorritako jokalaririk egon ez arren, harrobiak emango dio beste behingoz Laskoraini bere fruitua. Bigarren taldeko 5 jokalarik bete dute aurredenboraldia gainontzekoekin eta sailkapeneko postu gorenetan borrokatzeko potentziala dagoenaren sinesmen osoa dago klubean.
Ligaren hasiera datorren larunbatean, hilak 22, izango du Laskorainek Aurrera Vitoria CDren aurka, Usabalen.
Eskualdeko lau talde batera
Hirugarren mailan eskualdeko beste hiru taldek parte hartuko dute: Egintza Transportes Lakunza talde billabonatarra, Ibarra FS eta Tolosala.