Ez gara merkantzia izenburupean, datorren astelehenean hasiko dira Tolosa Naturaldia 2012 jardunaldiak. Tolosan astelehenetik ostirala bitarte hainbat jarduera izango dira: proiekzioak, hitzaldiak eta mahai inguruak. Topic zentroan egingo dituzte eta sarrera doan izango da. Hilaren 28an, larunbatean, bokazio naturalista duten artistek eta taldeek sortutako eta Alkizan dagoen Urmara espazio esperimentalera bisita antolatu dute. Jardunaldien helburua pertsonen bizimoduak planetarengan eta izaki bizidunengan duen eraginari buruzko gogoeta egitea da. Jardunaldiak gaur aurkeztu dituzte Ainhoa Iraola Ingurumeneko eta Obra Hidraulikoetako zuzendariak, Hasier de los Rios Tolosako Udaleko Ingurumen, Garapen Ekonomiko, Merkataritza eta Turismo zinegotziak eta Shole Martin jardunaldien antolatzaileak. Aldundiaren eta Tolosako Udalaren laguntzarekin, besteak beste, antolatu dira jardunaldiak.
Eskualdeko egitaraua
Tolosa
Apirilak 23, astelehena. Topic zentroan, 19:30ean, Yann Arthud-Bertrand-en Home filmaren proiekzioa. Jacqueline Gooffart izango ondorengo solasaldian.
Apirilak 24, asteartea. Topic zentroan, 19:30ean, Natura, oreka, zoriontasuna hitzaldia Francisco Lozano Winterhalder-en eskutik.
Apirilak 25, asteazkena. Topic zentroan, 19:30ean, El planeta libre filmaren proiekzioa. Mario Rodriguez Vargas izango da ondorengo solasaldian.
Apirilak 26, osteguna. Topic zentroan, 19:30ean, mahai ingurua: Zenbat eta gehiago, orduan eta hobeto? Etorkizuneko gizarteaz eta bizieraz izenburupean. Parte hartzaileak: Joseba Azkarraga, Jose Maria Hernandez eta Itziar Arkonada.
Apirilak 27, ostirala. Topic zentroan, 19:30ean, hitzaldia: ¿Está cayendo el cielo sobre nuestras cabezas? izenburupean, Joaquin Araujo eta Antonio Fraguas Forges-en eskutik.
Alkiza
Apirilak 28, larunbata. Urmara gune esperimentalera bisitaldia. 10:00etan elkartuko dira herriko plazan.