Hilabete honetako Galtzaundi Irakurle Taldeak gaur izango du hitzordua, eta Irène Némirovskyren Suite Frantsesa eleberria izango dute hizpide.
2011. urte amaieran argitaratu zuen Alberdania argitaletxeak, eleberri entzutetsuaren euskarazko bertsioa; Mikel Garmendia Ugarte eta Jose Antonio Sarasola Arregi dira itzultzaileak.
Nobela ezohiko egoeretan idatzia izan zen, eta XX. mendean Europa bizi izan zen tragedia islatzen du, oso nabaria den kutsu autobiografikoarekin. Idazle ukraniarrak alemaniarrak Parisen sartzen direneko uneekin hasten du liburua, eta zenbaitek «okupazio garaiari buruz idatzi den fikzio lanik egiantzekoena» dela diote.
Galtzaundi Irakurle Taldeko kideak 19:30ean elkartuko dira, kultur etxean.