Lodosako Ibaialde ikastolaren egoera ekonomiko larria dela eta, elkartasun eguna antolatu dute Laskorain ikastolan.
Goizeko 10ak aldera, Lehen Hezkuntzako 3. mailatik Batxilergo 2. mailara arteko neska-mutilek giza-katea osatu dute Usabaletik Sakramentinoetara, eta jarraian, Batxilergo 1. mailako ikasleek txistorra bokadiloak salgai jarri dituzte; era berean, dantza ikuskizuna eta bestelako jarduera antolatu dituzte goizerako.
Arratsaldean, berriz, txokolatea ere salgai jarriko dute, eta ateratako diru guztia Lodosako ikastolari laguntzera bideratuko dute. Laskorainen helburua, ikasle bakoitzeko euro bana biltzea izango da gaur antolatutako ekimenarekin.