Musikari lanetan hasi bazen ere, umorearen bidea hartu zuen duela urte batzuk, David Guapo kataluniarrak, eta bere bakarrizketak, gitarra eta kantuez lagundurik, ikusgai izango dira gaur, Leidorren.
Azken hiruzpalau urteotan, telebistako zenbait programaren bidez ezaguna egin da David Guapo umorista; Andreu Buenafuenterekin aritu izan da, esaterako, eta era berean, Paramount Comedy katean, nahiz Sé lo que hicisteis, El Hormiguero nahiz El Club de la Comedia saioetan parte hartutakoa da.
Umore ikuskizunetan hasi baino lehen, ordea, David Guapo izen artistikoa duen David Callejón Kataluniako eta San Frantziskoko (AEB) tabernetan aritzen zen musikari moduan. Garai hartan hasi zen, emanaldietan pixkanaka hizketan, eta orduz geroztik musika eta umore-bakarrizketak uztartzen ditu aretoz areto.
Gaur Leidorren izango da, Que no nos frunjan la fiesta ikuskizunarekin, 20:30ean.