Larunbat honetan Gipuzkoako Taldekako Xake Liga hasi zen. Tolosa-Ibarra hiru talderekin ari da parte hartzen bertan, bat bigarren mailan eta bi hirugarren mailan. Bigarren mailan A taldeak bina berdindu zuen Hernani Bren aurka etxean. Jokin Mendia eta Cayetano Otaegik lortu zituzten puntuak. Hirugarren mailan, elkarren aurka jokatu zuten elkarteko bi taldeek. B taldeak 4-0 irabazi zion C taldeari. Danel Intxaurrondo, Mikel Muguruza, Carina Gonzalez eta Mikel Arechagak irabazi zuten.
Bestalde, aurreko igandean, Aurrera elkarteak Xake Azkarreko Insaustiren XXV. Memoriala antolatu zuen. Eskualde guztiko hemezortzi jokalari bildu zituen, eta Villabonako Jose Luis Guijarro izan zen txapelduna, finalean Astigarragako Mundarro taldeko Asier Urretabizkaiari irabazita. Hirugarren Tolosa-Ibarrako Xabier Mujika sailkatu zen. Antolaketak bi sari berezi gehiago banatu zituen: Infantil hoberenaren saria Miguel Aroztegi beasaindarrak eraman zuen etxera, eta jokalari gazteenaren saria, Unai Zubeldia anoetarrarentzat izan zen.