Santa Maria parrokiko musika kaperak urteko hitzordu berri bat izango du, igandean, Urteberri egunean. Parrokian meza nagusia izango da, 12:00etan, eta bertan Eduardo Mokoroa eta Felipi Gorritiren obrak abestuko dituzte.
Alde batetik, Eduardo Mokoroak 1909an konposatutako Misa Pastoral abestuko dute kaperakoek. Hain justu, Gabon egunetan kantatzeko egin zuen obra. Oi Betlehem eta Belenen sortu zaigu Jainkoa Gabon kantak abestuko dituzte, Mokoroa berak orkestrarako moldatuta. Musikariak egindako Cantate Domino ere interpretatuko dute.
Bestalde, Felipe Gorritik konposatutako Gabonetarako zortzikoa abestuko dute. Gorritik 1889an sortu zuen, inude bati entzundako herri kanta batean oinarrituz.
Kaperaren zuzendari lanetan Iñaki Ayerbe ariko da. Loreto Fernandez izango da organista. Bakarlari bezala Joxeja Garcia, Manuel Muñoa, Jexuxmari Jauregi, Javier Yarza, Axun Gaztañaga eta Maite Crespillo. 20 musikarik parte hartzen dute hari eta haize orkestran, eta 70 abeslarik osatzen dute korua.