Kasino elkarteak antolatu dituen Mikologia jardunaldien barruan, hitzaldia eskainiko du bihar, Aranzadi Zientzia Elkarteko Mikologia zuzendaria den Pedro Arrillagak. Elkarrizketa osorik irakurtzeko aukera izango da, biharko papereko edizioan.
Aranzadi Zientzia Elkarteko Mikologia saileko zuzendaria da Pedro Arrillaga (XXX, 1949). Kasino elkarteak antolatu dituen Mikologia jardunaldien barruan, Agaricus espeziearen, edo barrengorrien inguruko hitzaldia eskainiko du bihar, 20:00etatik aurrera, Idiakez jauregian.
Eskainiko duzun hitzaldian zein ildo jarraituko duzu?
Funtsezko ideia Agaricus generoari buruz aritzea da; hizkera arruntean barrengorri deitzen diegunak dira hauek. Gure inguruan ordezkaritza zabala du genero honek. Duela urte batzuk, dozena erdi bat agaricus desberdin zeudela uste genuen, baina 50 barrengorri espezie desberdin biltzea lortu dugu. Espezie hauetariko batzuk sukaldaritzarako biltzen dira, baina gehienak ezezagunak dira helburu gastronomikoekin, mendian perretxikoak jasotzeko ohitura duen jendearentzat. Euskal Herrian jaso ditugun agaricusei buruz hitz egingo dut, eta beren inguruari buruz ere bai. Era berean, espezie hauek identifikatzeko moduak ere azalduko ditut, espezializatutako generoa den arren. Jarraian, espeziearen ezaugarri makroskopikoak nahiz hauek jaterako orduan kontuan izan beharreko ezaugarriak ere, hizpide izango dira.