Iritsi da aurtengo Txapin Festa, Tolosako gazteek eurek antolatutako eguna. Goizean goiz kalejira abiatu da gazte lokaletatik barrena, baina eguerdiko 13:00ean iritsi da herritar gehien bildu dituen ekitaldia: baltsa jaitsiera.
Antolatzaileek uztitako materialarekin, eta talde bakoitzaren ukitu pertsonalarekin, hainbat gaztek baltsak prestatu dituzte Igarondo igerilekua zegoen lekutik Zerkausiraino iristeko. Eguraldiak lagunduta, hamaika herritar hurbildu dire ibai ertzeko pasealekura jaitsiera ikusteko. Zerkausira iristerako, baltsa gehienak puskatu zaizkie gazteei, baina izan da ontzi gainean iritsi denik ere. Baltsaz gainera, mozorroturik ere ikus zitekeen jendea: arrainez, soroslez, pirataz,...
Baltsa jaitsiera amaitu eta gero, bazkaria izango dute Plaza Berrian, eta gauerdira arte egitarau zabala prestatu dute maiatzaren 21 honetarako.
Egitaraua:
-14.30etan bazkaria Plaza Berrian. Bazkarira datozenei Txapin Festa kamiseta oparituko diete.
-Bazkalostean bertsolariak
-17.00etan herri jolasak Mulanbok alaituta
-19.30ean kontzertua KEIRAN taldearekin
-21.30ean zahagi sagardoa. Ekarri zure afaria, sagardoa izango da eta!
-22.30ean kontzertuak YUCATAN eta SWITCH taldeekin
-0.30etik aurrera DJak tabernetan:
Eguzki: JOKIN
Kikara: PUNTZAKA
Cafe Iruña: NEKION
Ieltxu: TEDI
Sugar-sugar: ANDONI DJ
Bikutz: DANTZALEKU
Raku: BULL
1.00etik 3.00etara eskaintza bereziak izango dira alde zaharreko tabernetan.
