Urkizu, Bedaio eta Aldabako emakumeek txangoa antolatu dute Bilbora, Emakumeen Eguna ospatu asmoz. Martxoaren 19an, larunbata, goizeko hamarretan dute hitzordua Benta Haundin. Goizean Guggenheim ikusiko dute, bertan gainera, Erdi Aroko emakumeek izan zuten rol aldaketaren erakusketa dago ikusgai. Museoko jatetxean bazkaldu eta arratsaldea Alde Zaharrean pasako dute. Landa Eremuko emakumeek azken urte hauetan antolatzen duten egun hau, elkarren arteko harremanak estutzeko eta egun polit bat pasatzeko aukera izaten da. Auzotarrek beraien elkarteetan eman beharko dute izena martxoaren 11a baino lehen, edota auzoetako ordezkarien telefonora deituz.