Atzo estreinatu zen Leidor aretoan Ibarrako Alurr dantza taldearen lan berria, Oinazez. Pertsona baten barne borroka islatu zuen lanak, aurrera egin nahi eta ezin duenarena. Dena dela, oinazearen gainetik, borroka horiek gainditzea lortzen du, neurri batean bada ere. Hori adierazteko, euskal dantza tradizionalak erabili dituzte, baina garaikiderantz joz, aurrekoetan baino gehiago gainera. Guztia zuzeneko musikaz lagundurik.
Aiert Beobide da ikuskizunaren zuzendaria eta koreografoa, eta berarekin batera, Katixa Agirre aritu da prestatzen. Iñar Sastre, Leire Zumeta, Eguzki Errondosoro, Iraitz Zabaleta, Carmiña Dovales, Leire Telletxea eta Jagoba Astiazaranek egin dute musika eta Ramon Garciak eta taldeko kideek egin dituzte jantziak.
Beterik zegoen Leidor aretoan harrera oso ona izan zuen lanaren estreinaldiak. Horren adierazle, dantzariek etengabe jaso zituzten txalo zaparradak.