Tolosa&Co merkataritza elkartea saritu dute Espainiako Barne Merkataritza Sarietan. Tolosako elkarteak sari nagusia irabazi ez badu ere, accesita [sariaren hurrengo mailako aitormena] jaso du Merkataritza Gure Irekien arloan.
Kategoria horretan kontuan hartzen dituzte asoziazionismo komertziala, eta gertuko merkataritza bizirik zein lehiakor mantentzeko gaitasuna. Hori horrela, lau arlo nagusi baloratzen dituzte, hain zuzen, elkartearen kudeaketa eta profesionalizazioa, elkartekideei ematen dizkieten zerbitzuak, saltoki txikiak sustatzeko gaitasuna eta bisitariak erakartzeko ahalmena.
Aipamenaren arrazoiak
Tolosa&Co elkartea saritu dute, hain zuzen, hainbat ekimen antolatzen dituelako tokiko merkataritza, ostalaritza eta zerbitzuak sustatzeko. Ekimen horien helburuak dira, besteak beste, saltoki txikien digitalizazioa, jasangarritasuna eta dinamizazio komertziala sustatzea. Eta elkarteak antolatzen dituen jardueretako batzuk dira moda desfilea, Braderie azoka eta sustapen kanpainak.