Tolosako Udalak erabateko arbuioa adierazi du bart gauean Andre Maria kalearen atzealdean Tolosako Udaltzaingoko agenteen aurka izandako erasoaren aurrean. «Indarkeriazko edozein jokabide onartezina da, eta kasu honetan udal langileen aurkakoa, herritarren segurtasuna eta elkarbizitza bermatzeko ardura duten profesionalen aurkakoa, hain zuzen ere». Udalak elkartasuna eta babes osoa helarazi nahi dizkie erasoa jasan duten agenteei, eta eskerrak eman nahi dizkie eguneroko lanean herritarren zerbitzura aritzen diren udal langile guztiei.
Tolosako Udalak azaldu du bizikidetzaren, elkarrekiko errespetuaren eta elkarrizketaren aldeko konpromisoa berresten duela. «Tolosak elkarbizitzan oinarritutako herria izaten jarraitu nahi du, desadostasunak eta gatazkak betiere errespetuz, elkarrizketaren bidez eta bide baketsuak erabilita kudeatzen dituena», esan dute. Ildo horretan, udalak herritar guztiei dei egin die errespetuan, arduran eta elkarbizitzan oinarritutako jarrerak sustatzera, «guztion artean Tolosa seguruagoa, kohesionatuagoa eta bizikidetzan oinarritutako herria izan dadin».