Eukene Larrarte txirrindulari tolosarra ostiralean lehiatu zen azken aldiz profesional mailan, UCI CL2 kategoriako proba batean. Bartzelonako 22. Nazioarteko Txapelketa - XIII. Miquel Poblet Oroimenezkoan parte hartu zuen, madisonean Megan Jastrab estatubatuarrarekin, eta bigarren izan ziren. Larunbatean, pista berean, aurten lehia uztea erabaki duten Cybele Schneider suitzarra, Eukene Larrarte eta Laura Rodriguez kataluniarra omendu zituzten.
Urte eta erdi da Eukene Larrartek txirrindularitza utzi zuela. «Zapore gazi-gozoarekin utzi nuen, eta txapelketa hau asko gustatu izan zait beti. Berezia da niretzat, eta bertan lehiatzea pentsatu nuen, agur esan aurretik. Gozatzera etorri naiz. Nire lagunak eta nire prestatzaileak ere etorri dira, eta asko ari gara gozatzen», adierazi zuen larunbatean Bartzelonan bertan egin zioten elkarrizketa batean. Probari buruz galdetuta, emaitzarekin «oso kontentu» zegoela aitortu zuen. «Asko gozatu nuen, eta gainera, bigarren izan ginen. Lehen postua lortzeko ere borrokatu genuen».