Atzo hasi eta gaur amaituko dira ekitaldiak Kultura Plazara jaialdiaren hitzordu nagusian. Gaur goizean eskualdeko artisauek eta ekoizleek postuak jarri dituzte, eta bertaratu diren herritarrek haien produktuak ezagutzeko aukera izan dute azokan.
Hamalau bat postu bildu dituzte, guztira, gaur goizetik eguerdira, eta askotariko produktuak jarri dituzte eskuragarri, horien artean, belarritakoak, bitxiak, arropa, jakiak, jostailuak, poltsak eta koadernoak. Arratsaldera begira ere hainbat hitzordu izango dira Zumardiaundian, hain zuzen, 18:00etan hasiko da J. M. Brutal, La Pez konpainiaren kale antzerki ikuskizuna; eta antzerkiari segida zuzeneko musikak emango dio, kontzertu bana emango baitute Bengo eta Gēre musikariek, hurrenez hurren, 20:00etan eta 22:00etan.